عربية حمادي :"يا مريم ربي يهنيك انت وخليل.. ونتمنّى من ڤلبي نبرة الحزن إلّي في صوتك تختفي"


لأول مرة، كشفت صانعة المحتوى التونسية مريم الدباغ، عن الهوية الكاملة لزوجها.
وقالت خلال حضورها ببرنامج "فكرة سامي الفهري"، انها متزوجة من اللاعب السابق بالترجي الرياضي خليل شمّام.
وأكّدت مريم الدباغ انها تزوّجت من خليل شمام يوم 30 جوان 2023 كما أوضحت أنها اختارت اخفاء زواجها باختيار منهما.
وأشارت مريم خلال الحلقة إلى أنها قامت بتغيير العديد من الجوانب في شخصيتها من أجل إرضاء زوجها وجعل العلاقة بينهما تسير بشكل أكثر انسجامًا.
وتعليقا على تصريحاتها، نشرت الإعلامية عربية حمادي تدوينة مطوّلة على حسابها الخاص جاء فيها :"
كنت من أكثر النّاس إلّي حاربتها و من أوّل النّاس إلّي كيف قابلتها وجها لوجه في بلاتو تلفزي هاجمتها و ڤلتلها إلّي في ڤلبي و في ڤلوب برشا ناس من غير فيلتر ...
رفضت وجودها في الإعلام و رفضت طريقتها المستفزّة في البلاتوات و إعتبرتها من رموز الرّداءة في الإعلام و أعلنت هذا للنّاس الكلّ في صفحتي و كلّ البلاتوات إلّي تعدّيت فيها.... نهارة إلّي تعرّضت لمأزق قانوني سارعت بتقديم تنازل على حقّي قبل حتّى ما هي تطلبو لأنّو عمرو ما كان هدفي نتسبّب في دخولها هي أو غيرها للحبس هدفي كان ومازال التّأكيد على علويّة القانون
البارح و أنا في اللاّيف هي كانت في برنامج هادي_زعيّم و رغم رفضي لها النّوعيّة من الإستضافات و الحوارات إلّي ما عندها حتّى علاقة بواقعنا و مشاكلنا إلاّ إنّي ما نجّمش ما نعلّقش على ها اللّقاء خاصّة و إنّو برشا بعثولي الجزء إلّي تجبد فيه إسمي و مش لأنّو إسمي تجبد كتبت ها التّدوينة لأنّو مواقفي ثابتة قبل و بعد أي كلام سلبي أو إيجابي يتڤال في حقّي ومش باش نعلّق على ما قيل في حقّي لأنّي علّقت عليه البارح في ستوري على الأنستغرام آما تعليقي باش يكون على جزء من الحوار ونحبّو يكون في تدوينة مش في ستوري....".
مضيفة :" الجزء هذا هو حديثها على علاقتها بزوجها ونبرة الحزن والخوف إلّي حسّيتهم وقت شفت الفيديو وهي تحكي على كرهها لكلمة الطّلاق و عتابها على ناس معيّنين في حياتها إلّي قد يكونو مصدر مشاكل مانيش باش ندخل في علاقات خاصّة آما باش نعلّق على مشهد عامّ يدّعي اللاّخطأ و لاّ خطيئة يستعرض في عضلات شرفو و عفّتو من خلال تعليقات تحت فيديو أو تصويرة يجرح فيها بكلام ما يضيف كان ذنوب لصاحبو و إساءة للمعنية بالأمر باش يظهر أو تظهر في ثوب الملائكة لا يا سادة كلّنا و بدون إستثناء عندنا عيوبنا و أغلاطنا ممكن تفرق من واحد لواحد آما ما فينا حدّ ملايكة و بالتّالي يا تكون عندك كلمة طيّبة تقولها أو تسكت و تكتفي بربّي يهدي خاصّة وقت الشّخص قاعد يحاول يصلّح من روحو و يبعد على حاجة إعترف إنّها كانت غالطة و يحبّ يكوِّن عايلة و يستمرّ في حياة فرحان بيها و مرتاح كان من كلام النّاس و تدخّلات النّاس و بالتّالي نحبّ نڤول لمريم الدبّاغ و زوجها خليل شمّام ربّي يهنّيكم و ربّي يكتبلكم الخير و نتمنّى من ڤلبي نبرة الخوف و الحزن إلّي حسّيتهم في صوتك يا مريم تختفي و تحسّي بالأمان والإستقرار باش تكمّلي حياتك إلّي ڤاعدة تحاولي تبنيها بعيدا عن الإعلام و الأضواء.. أنا كنت ضدّ مريم الدبّاغ التي أساءت للمشهد الإعلامي و سعيت لإبعادها منه و أنا أتمنّى كلّ الخير والتّوفيق ".
الفيديو :





         
تعليقات