استأنفت الإعلامية عفاف الغربي اليوم تقديم برنامجها "Café Crème" على إذاعة ديوان أف أم بعد وفاة صديقتها والكرونيكوز سابقا في البرنامج ريم الحمروني ، وتأثرت عفاف الغربي وهي تتحدّث على صديقتها الراحلة.
وقالت بتأثر شديد :"نحب نشكركم الناس الكل على رسائل الدعم و المساندة ، نتصور ريم فرحانة برشا ببلاصتها في قلوبكم وهذا يخليني ديما فخورة بيها كيما ديما ... أولا إسمحو لي بالتعبير على ما في داخلي خاطر كنت مانيش موجودة و بعيدة و برشا ظروف خلاتني كنت بعيدة و ربي سبحانو يعرف صعب اللحظة عليا كان كنت موجودة، كنت في أقدس تراب على وجه الأرض و في مكان طاهر ندعيلها فيه وهذه حكمة ربي..اللهم لا إعتراض".
وأضافت عفاف :"ريم تحبني ديما فرحانة وتحب الناس الكل و تونس زاهية... لكن ياصديقتي و رفيقتي رحيلك ، وياقطعة مني رحيلك دمرني فعلا ووجيعتي و بكائي موش خسارة فيك... تعرفوا شمعناها repère في الحياة... ريم كانت بوصلة حياتي الكل و نرجعلها في كل شي في عايلتي و في مشاكلي و في حياتي الكل و في الكبيرة و الصغيرة ... ماثماش لحظة ماتقاسمتهاش مع ريم ... ملي عرفتها معاش نحكي مع روحي و ليت نحكي مع ريم و نفرغ قلبي لريم ونقعد معاها و نستشيرها في علاقاتي و إختياراتي... نفرح ونحزن و نضحك معاها ووصلنا نحكيو وسط الناس بغزرة من غير مانحكيو... مانيش حاضرة نفسيا لغيابك و منيش مستوعبة .. نقلك نحبك و قلتهالك و ديما نقولهالك ومستحيل نلقى صديقة كيفك تكره لي يكرهني أكثر مني و نحبك ريم وبش نقعد نحبك و ديما نقلك أمي و بنتي و مانعرفوش شكون الأم والبنت".
الفيديو :